2026 ஆம் ஆண்டில் அரச சேவையில் 1,20,000 க்கும் மேற்பட்ட நபர்களைப் புதிதாக இணைத்துக் கொள்வதற்கான விரிவான வேலைத்திட்டத்தை அரசாங்கம் ஆரம்பித்துள்ளதாகப் பொது நிர்வாக அமைச்சர் சந்தன அபேரத்ன தெரிவித்துள்ளார்.
கல்வி, சுகாதாரம் மற்றும் விவசாயம் உள்ளிட்ட பொதுத் துறைகளில் காலியாக உள்ள பணியிடங்களை நிரப்புவதை நோக்கமாகக் கொண்டு இந்த ஆள்சேர்ப்பு நடவடிக்கை முன்னெடுக்கப்படுவதாக அமைச்சர் ஊடகவியலாளர்களிடம் தெரிவித்தார்.
இவ்வேலைத்திட்டத்தின் கீழ் சுமார் 30,000 ஆசிரியர்களை நியமிக்க எதிர்பார்க்கப்பட்டுள்ளதுடன், இதற்கான போட்டிப் பரீட்சை விரைவில் நடத்தப்படவுள்ளது.
இப்பரீட்சையில் சித்தியடைபவர்கள் நேர்முகத் தேர்வுக்கு அழைக்கப்படுவர் என்றும், இதற்கான ஏற்பாடுகள் ஏற்கனவே செய்யப்பட்டுள்ளதாகவும் அவர் கூறினார்.
இதேவேளை, 1,500 க்கும் மேற்பட்ட கிராம உத்தியோகத்தர்களுக்கான ஆள்சேர்ப்பு நடவடிக்கை இறுதிப் கட்டத்தை எட்டியுள்ளது.
இதற்கான பரீட்சைகள் மற்றும் நேர்முகத் தேர்வுகள் முடிவடைந்துள்ளதுடன், தெரிவுசெய்யப்பட்டவர்களுக்கான நியமனக் கடிதங்களை வழங்க அதிகாரிகள் நடவடிக்கை எடுத்து வருகின்றனர்.
மேலும், சுகாதாரம் மற்றும் விவசாயத் துறைகள் உட்பட அரச சேவையின் பல பிரிவுகளில் உள்ள காலியிடங்களை நிரப்பவும் திட்டமிடப்பட்டுள்ளது.
கடந்த 2025 ஆம் ஆண்டில் பட்டதாரிகள் மற்றும் தகுதியுள்ள இளைஞர்கள் உட்பட சுமார் 35,000 பேர் அரச சேவையில் இணைக்கப்பட்டதாகக் குறிப்பிட்ட அமைச்சர், இவ்வாண்டில் 1,20,000 க்கும் அதிகமானோரைச் சேர்க்கும் பணிகள் ஏற்கனவே தொடங்கப்பட்டு விட்டதாகத் தெரிவித்தார்.
#SriLankaNews #StateJobs #PublicSectorLK #SriLankaGovt #EmploymentLK
