ரத்மலானை கோனகோவில் பகுதியில் பல்வேறு ஆயுதங்கள், உள்நாட்டில் தயாரிக்கப்பட்ட கைக்குண்டு மற்றும் போதைப்பொருள் விற்பனை மூலம் பெறப்பட்டதாக சந்தேகிக்கப்படும் ரூ.3 இலட்சம் பணத்துடன் 6 சந்தேகநபர்கள் கைது செய்யப்பட்டுள்ளனர்.கல்கிஸ்ஸை பொலிஸ் ஊழல் தடுப்பு பிரிவினரால் மேற்கொள்ளப்பட்ட சோதனையில், 3 வாள்கள், கோடரி, 3 கத்திகள், உள்நாட்டில் தயாரிக்கப்பட்ட கைக்குண்டு மற்றும் 8 கையடக்கத் தொலைபேசிகள் கைப்பற்றப்பட்டுள்ளன.
கல்கிஸ்ஸை பொலிஸ் விசேட மோட்டார் சைக்கிள் பிரிவைச் சேர்ந்த அதிகாரி ஒருவர் ரத்மலானை ஆர்தர்ஸ் பிளேஸ் பகுதியில் 1,000 மில்லிகிராம் ‘ஐஸ்’ எனப்படும் கிரிஸ்டல் மெத்தாம்பெட்டமைனுடன் ஒருவரை கைது செய்திருந்தார்.அவரிடம் மேற்கொள்ளப்பட்ட விசாரணைகளின் அடிப்படையில், போதைப்பொருள் விற்பனைக்குப் பயன்படுத்தப்பட்டதாக சந்தேகிக்கப்படும் வீடொன்று தொடர்பில் தகவல் கிடைத்துள்ளது.
அந்த வீட்டில் மேற்கொள்ளப்பட்ட சோதனையின்போது ஆயுதங்கள், பணம் மற்றும் கையடக்கத் தொலைபேசிகள் கைப்பற்றப்பட்டதுடன், 6 சந்தேகநபர்களும் கைது செய்யப்பட்டுள்ளனர்.கைது செய்யப்பட்டவர்களில் பிரதான சந்தேகநபர் 29 வயதுடையவர் எனவும், ஏனையவர்கள் 22, 24, 33, 36 மற்றும் 51 வயதுடையவர்கள் எனவும் பொலிஸார் தெரிவித்துள்ளனர்.
இவர்கள் ரத்மலானை, நாவலப்பிட்டி மற்றும் எஹெலியகொட பகுதிகளைச் சேர்ந்தவர்கள் என தெரிவிக்கப்பட்டுள்ளது. சம்பவம் தொடர்பில் மேலதிக விசாரணைகள் முன்னெடுக்கப்பட்டு வருகின்றன.
