இலங்கையின் கூட்டுறவு மொத்த விற்பனை நிறுவனமான CWE-ஐ மீண்டும் செயல்பாட்டுக்குக் கொண்டுவந்து, அதன் செயல்திறனை மேம்படுத்தும் நோக்கில் புதிய தலைமை நிர்வாக அதிகாரி உள்ளிட்ட சிரேஷ்ட அதிகாரிகள் நியமிக்கப்பட்டுள்ளனர்.
கடந்த ஒக்டோபர் 19ஆம் திகதி, வர்த்தகம், வணிகம், உணவுப் பாதுகாப்பு மற்றும் கூட்டுறவு அபிவிருத்தி அமைச்சில் அமைச்சர் வசந்த சமரசிங்கவினால் இந்த நியமனங்கள் வழங்கப்பட்டன.
1949ஆம் ஆண்டு நிறுவப்பட்ட CWE நிறுவனத்தின் செயற்பாடுகள் 2023ஆம் ஆண்டு இடைநிறுத்தப்பட்டு, கலைப்பு நடவடிக்கைகள் முன்னெடுக்கப்பட்டன. பின்னர் அத்தியாவசியப் பொருட்களை நியாயமான விலையில் வழங்கும் நோக்கில் நிறுவனத்தை மீளமைக்க அரசாங்கம் தீர்மானித்தது.
உள்ளூர் விவசாயிகளிடமிருந்து விளைபொருட்களைக் கொள்வனவு செய்தல், நேரடி இறக்குமதி மற்றும் நாடளாவிய விநியோக வலையமைப்பை உருவாக்குதல் ஆகியவை மீளமைப்புத் திட்டத்தில் உள்ளடக்கப்பட்டுள்ளன.
